Нягледзячы на тое, што канец восені цешыць нас цёплымі днямі, самы час задумацца аб навагодніх святах. А што яшчэ, як ні прыбраныя ёлкі, так падымае нам настрой, вяртаючы ў дзяцінства? Менавіта яны, ёлачныя цацкі, становяцца сімвалам той радаснай пары, калі мы прыбіралі навагоднюю прыгажуню ўсёй сям’ёй, у прадчуванні падарункаў і сапраўдных цудаў… Мы прапануем наведвальнікам успомніць, як гэта было.

У Пружанскім палацыку будзе наладжана выстава навагодніх цацак савецкага часу. Запрашаем усіх неабыякавых падтрымаць нашу ініцыятыву і прынесці ў музей новыя экспанаты – ёлачныя цацкі.

Звяртацца па нумарах 2 98 06 ці 2 18 96

13 лістапада музей-сядзібу “Пружанскі палацык” наведалі супрацоўнікі Баранавіцкай раённай цэнтралізаванай бібліятэчнай сістэмы, а таксама актыўныя чытачы бібліятэк.

На восеньскіх канікулах музей-сядзібу “Пружанскі палацык” наведалі вучні ўстаноў адукацыі г.Пружаны, аг.Варанілавічы, аг.Мурава, аг.Навасёлкі, а таксама школьнікі з г.Кобрын, настаўнікі школ г.Стоўбцы, удзельнікі гурткоў Брэсцкага абласнога цэнтра турызму і краязнаўства.

Для іх былі праведзены аглядныя экскурсіі па музеі, лекцыі, прысвечаныя жыццю і творчасці Народнага майстра Рэспублікі Беларусь Мікалая Тарасюка. А госці з г.Брэст пасля экскурсіі па музеі з задавальненнем прынялі ўдзел у квэсце “Ключ Пружаны”.

У музеі-сядзібе “Пружанскі палацык” з 14 кастрычніка 2021 года працуе выстава “Палотнаў вышытых узор”, на якой прадстаўлены работы майстрых-вышывальшчыц Святланы Швед і Алены Клімянковай з аграгарадка Клепачы.

Святлана Швед амаль 25 год захапляецца мастацкай вышыўкай. Яна не толькі прысвячае любімаму занятку свой вольны час, але і вучыць вышыўцы ўсіх жадаючых у гуртку дэкаратыўна-прыкладнога мастацтва ў Кляпацкім сельскім Доме культуры. У калекцыі аўтара, які аддае прыярытэт вышыўцы крыжыкам, больш сотні твораў з сучаснымі і народнымі сюжэтамі.

21 кастрычніка навучэнцы сярэдняй школы №5 г. Пружаны наведалі музей-сядзібу “Пружанскі палацык”. Навуковы супрацоўнік правяла для гасцей лекцыю “Таямніцы беларускай хаты”. У этнаграфічнай залі школьнікі мелі выдатную магчымасць пазнаёміцца з беларускім сялянскім побытам, атрымалі шмат каштоўнай інфармацыі пра вясковыя прылады працы і посуд, іх прызначэнне і выкарыстанне, а таксама даведаліся многа новага пра адзін з самых старажытных і найбольш распаўсюджаных відаў народнага  мастацтва  – ткацтва.

Вельмі зацікавіла гасцей выстава работ Народнага майстра Рэспублікі Беларусь Мікалая Тарасюка “ЧАЛАВЕК – ЗЯМЛЯ – ДРЭВА”. Як высветлілася, некалькі гадоў назад вучні наведвалі музей Мікалая Тарасюка ў в. Стойлы і выдатна валодаюць інфармацыяй пра знакамітага земляка.

У фондах музея-сядзібы “Пружанскі палацык” захоўваецца вялікая калекцыя друкаваных выданняў – ажно 527 адзінак. Сярод іх – часопісы, газеты, кнігі, падручнікі, брашуры і інш. Зусім нядаўна калекцыю папоўніў яшчэ адзін цікавы прадмет – газета “Известия” за 21 чэрвеня 1941 года. Газета, якая была выдадзена за дзень да пачатку вайны… Такі каштоўны экспанат быў перададзены палацыку вартаўніком музея Каробка Сяргеем Сяргеевічам.