Дзяржаўная ўстанова культуры “Музей-сядзіба Пружанскі палацык” запрашае прыняць удзел у рабоце VІI навукова-краязнаўчай канферэнцыі
“Пружанскі дыярыуш”
23 лістапада 2018 года
Пружаншчына разам з іншымі землямі сучаснага беларуска-польска-украінскага памежжа з’яўляецца цікавым гісторыка-культурным і прыродна-геаграфічным рэгіёнам. З гэтай тэрыторыяй звязаны многія гераічныя і трагічныя падзеі мінулага, а таксама імёны асоб, якія ўнеслі ўклад у гісторыю, культуру, навуку, грамадска-палітычнае жыццё не толькі Беларусі, але і замежжа. Асаблівую актуальнасць вывучэнне мікрагісторыі набыло ў 2018-м годзе, які аб’яўлены ў Беларусі Годам малой радзімы.
Мэтанакіраваную работу па зборы і захаванні матэрыяльнай і духоўнай спадчыны малой радзімы вядзе ДУК “Музей-сядзіба Пружанскі палацык”. Ён збірае звесткі аб мінуўшчыне і сучаснасці, асвятляе іх для шырокага кола грамадскасці. Навуковыя супрацоўнікі ўстановы маюць розную тэматыку даследаванняў. Музей супрацоўнічае з краязнаўцамі і навукоўцамі ў вывучэнні спадчыны раёна.
З 2012 г. у музеі-сядзібе штогод праводзяцца навукова-краязнаўчыя канферэнцыі, ужо выдадзена 5 зборнікаў дакладаў. З 2017 г. канферэнцыя атрымала пастаянную назву “Пружанскі дыярыуш”.
На сённяшні дзень вялікае кола навукоўцаў і краязнаўцаў займаюцца вывучэннем гістарычных падзей, культурнага жыцця, навакольнага асяроддзя, дзейнасці знакамітых асоб і інш. Таму пастаянна існуе неабходнасць абагульняць матэрыялы навуковых і краязнаўчых даследаванняў, абменьвацца дасягнутымі вынікамі, уводзіць у зварот новыя факты і знаёміць грамадскасць з даследчыцкімі напрацоўкамі з мэтай падрабязнага асвятлення жыцця Пружаншчыны і суседніх тэрыторый ў розныя эпохі і перыяды, а таксама вызначаць далейшыя накірункі ў справе вывучэння ўзгаданага рэгіёну.
На VІІ-й навукова-краязнаўчай канферэнцыі “Пружанскі дыярыуш” у ДУК “Музей-сядзіба Пружанскі палацык” тэматыка дакладаў не абмяжоўваецца пэўным перыядам ці накірункам даследаванняў. Да разгляду прымаюцца навуковыя работы, аб’ектам вывучэння ў якіх з’яўляецца рэгіён беларуска-польска-украінскага памежжа.
Прыярытэт пры адборы дакладаў на канферэнцыю аддаецца тэмам, якія звязаны з Пружаншчынай і суседнімі рэгіёнамі. Тэматыка дакладаў можа тычыцца розных перыядаў. Сярод юбілейных і памятных дат, якія могуць мець адносіны да Пружаншчыны, магчыма адзначыць:
- 155 год з пачатку нацыянальна-вызваленчага паўстання ў Польшчы, Беларусі і Літве (1863 – 1864 гг.);
- 100 год заканчэння Першай сусветнай вайны (1914 – 1918 гг.);
- 100 год абвяшчэння БНР (1918 г.);
- 95 год з часу стварэння КПЗБ (1923 г.);
- 585 год з часу першага ўзгадвання ў пісьмовых крыніцах “Прушанскай воласці” (1433 г.);
- 430 год з часу надання Ганнай Ягелонкай Магдэбургскага права Пружанам (1588 г.);
- 135 год з часу адкрыцця пружанскага касцёла Унебаўзяцця Найсвяцейшай Дзевы Марыі (1883 г.);
- 75 год з часу знішчэння пружанскага гета (1943 г.);
- 430 год з дня нараджэння вучонага Шымана Старавольскага (1588 – 1656);
- 210 год з дня нараджэння літаратара, грамадскага дзеяча Леана Зянковіча (1808 – 1870);
- 165 год з дня нараджэння этнографа Міхаіла Федароўскага (1853 – 1923);
- 115 год з дня нараджэння грамадскага дзеяча і вучонага Міколы Ільяшэвіча (1903 – 1934);
- 115 год з дня нараджэння палітычнага дзеяча Веры Харужай (1903 – 1942);
- 110 год з дня нараджэння паэта Міколы Засіма (1908 – 1957);
- 105 год з дня нараджэння мастака Міколы Чурабы (1913 – 1998)
- 95 год з дня нараджэння вучонага Серафіна Корчак-Міхалеўскага (1923 – 2006);
- 85 год з дня нараджэння мастачкі Алены Лось (1933 – 2013);
- 80 год з дня нараджэння савецкага трэнера Мікалая Карполя (нар. у 1938 г.) і інш.
Па выніках навукова-краязнаўчай канферэнцыі плануецца выданне навуковага зборніка.
Тэматычнае поле канферэнцыі:
- Гістарычнае мінулае рэгіёну: ад старажытнасці да сучаснасці;
- Заходняя Беларусь у складзе Польшчы;
- Помнікі гісторыка-культурнай спадчыны;
- Страчаная спадчына;
- Археалагічныя даследаванні;
- Асоба ў гісторыі і культуры: славутыя і забытыя імёны;
- Гісторыя сям’і ў гісторыі краіны;
- Літаратурная і мастацкая спадчына;
- Моўныя і этнічныя асаблівасці;
- Народныя майстры: імёны, традыцыі, школы;
- Рамёствы і промыслы;
- Этнаграфічная спадчына;
- Рэлігійнае краязнаўства;
- Міфалогія;
- Турыстычны патэнцыял рэгіёну;
- Геаграфічныя асаблівасці рэгіёну;
- Біялагічная разнастайнасць;
- Карысныя выкапні і прыродныя рэсурсы;
- Ахова прыроды;
- Белавежская пушча: мінулае і сучаснасць;
- Калекцыянаванне;
- Музейная справа;
- Сродкі масавай інфармацыі;
- Развіццё адукацыйнай справы;
- Сістэма аховы здароўя;
- Ваеннае мінулае;
- Будаўніцтва і камунікацыі;
- Эканоміка рэгіёну: праблемы і перспектывы;
- Спартыўныя дасягненні і інш.
Час правядзення канферэнцыі: 23 лістапада 2018 г.
Месца правядзення канферэнцыі – г. Пружаны, ДУК “Музей-сядзіба Пружанскі палацык”.
Заяўкі на ўдзел у канферэнцыі прымаюцца да 15 кастрычніка 2018 г. Тэксты дакладаў да 25 кастрычніка. Прымаюцца арыгінальныя працы, якія маюць навуковае і практычнае значэнне. Аргкамітэт пакідае за сабой права адбору дакладаў на канферэнцыю і матэрыялаў для публікацыі ў зборніку.
Пацвярджэнне аб удзеле ў канферэнцыі будзе даслана да 29 кастрычніка 2018 г.
У заяўцы паведамляецца імя, імя па бацьку і прозвішча дакладчыка, навуковая ступень і званне, пасада, назва даклада, назва ўстановы, якую ён прадстаўляе, адрас (хатні ці ўстановы) і кантакты.
Патрабаванні да тэкстаў дакладаў: электронны варыянт не болей за 20 тыс. знакаў, спасылкі пастаронкавыя, нумарацыя спасылак на кожнай старонцы. Артыкул павінен суправаджацца кароткім рэзюмэ (не болей за 600 друк. знакаў з прабеламі ) на англійскай мове. Абавязкова трэба пазначыць УДК і ББК!
Рабочыя мовы канферэнцыі: беларуская, руская, украінская, польская.
Заявы на ўдзел у канферэнцыі прымаюцца па электроннай пошце:
Кантакт: Зялевіч Юрый Сяргеевіч,
225133, г. Пружаны, вул. Савецкая, 50,
Тэл. (016) 329-03-06,
Прац. маб. +375333711342 (МТС),
Тэл/факс (016) 322-18-96
Е-mail: palacyk@tut.by
Удзел у канферэнцыі бясплатны, рэгістрацыйны ўзнос не бярэцца. Праезд, харчаванне – за кошт арганізацыі, якая накіроўвае, ці за ўласныя сродкі ўдзельнікаў.
Аргкамітэт
|
Накіраваць у аргкамітэт да 15 кастрычніка 2018 г. па электроным адрасе: palacyk@tut.by Заяўка ўдзельніка VІІ-й навукова-краязнаўчай канферэнцыі “Пружанскі дыярыуш” Прозвішча, імя, імя па бацьку: __________________________________________ Пасада, навуковая ступень, званне: ______________________________________ Установа: ___________________________________________________________ Адрас: _____________________________________________________________ Тэлефон:___________________Факс:_________________E-mail: _____________ Тэма даклада: ________________________________________________________
|